أشهب اللال
سلام يا من يرفع الراس لا قال @ يا شاعرٍ تاج البيوت وفخرها
ينقى معانيها جزيلات وثقال @ وعذب القوافي يقتفيها بأثــــرها
من لابةٍ لهم تواريخ وأفعال @ يشهد لها الماضي بطيّب سيّرها
يا عايض إن كانك تنشّد عن الحال @ خذ مني علومي ومبدا خبرها
أنا يا بو حيبان من ضيقة البال @ ضاقت بي الدنيا وضاقت ديّرها
وأفواج همي جات رجلي وخيّال @ همٍ غشا عوج الضلوع وغمرها
وجرّيت طاروقي على كل موال @ والليل طال ونوم عيني هجرها
ومشيت بدروبٍ عسيرات وطوال @ وخطاي تاهت والدروب تعسرها
وأسقتني أيامي من المر فنجال @ من دلة الدنيا وزايد كدرها
دنياً رحاها تفني أجيال وأجيال @ ولا ينجيك الحذر من قدرها
وأنا الغريق بلا مجاديف وحبال @ آصارع أمواجٍ بغبة بحرها
وأشكي عليك من الضما وأشهب اللال @ ومن غيمةٍ ما هلّ وابل مطرها
ويا شين جور الوقت في عين رجال @ لا صار له حاجة وهو ما قدرها
موت الرجال أهون ولا موت الآمال @ موت الحرار ولا تعيش بقهرها
وأنا عزاي الصبر مفتاح الأقفال @ ما دام عقب الليل واهج سفرها
ودام الرجال جبال لحمولها جمال @ ودام الأمل لا حل دارٍ عمرها
فأنا على دربي عزومٍ ورحّال @ بحول من شمسه تنّور قمرها
وكانك يا بو حيبان تنشد عن الحال @ جاتك علومي مبتداها خبرها
محسن بن حسن الزواحمة
نفس الفتى
يا مرحبا ترحيبة اخلاص واجلال @ تثنى تحيتها ويمطر مطرها
ما يرتخي للطيب في جالها جال @ ما دام هاجوس الضماير ومرها
بعلوم أبو نايف عسى أيامه طوال @ الشاعر اللي قام ينحت صخرها
وقام يتمثّل في المعاني تمثّال @ وأهدى علينا الغالية من دررها
جواهرٍ كنها جنيهات وريال @ هديةٍ قد لي زمان أنتظرها
منها عرفت أعراض وأوصاف وأشكال @ غُبر الهموم اللي تروّع صورها
وبيّن لنا شيٍ يفوق التحمّال @ صلاة جمعٍ جايزٍ لو قصرها
وأبدا الردود وكلمة الحق تنقال @ حسب العلوم اللي بقافه ذكرها
يا بو حسن يا طيّب الجد والخال @ الياس لا جاله بنفسٍ دمرها
يجلب عليها كل همٍ وغربال @ ويدمر قوايم عزّها ويحقرها
ونهايته يقضي على الحال والمال @ وان ما خذل نفس الفتى ما نصرها
والآدمي منهج حياته تنقّال @ مثل الهلال ورحلته في شهرها
يصبح بدر وبداية الرحله هلال @ ونهايته كأول حياتٍ ظهرها
تدبير من يكتب تواريخ الآجال @ وبيده نجاة الكاينات وضررها
والله يزيّن خاتمتنا بالأعمال @ ويدمح لنا غلطاتنا ويغفرها
وختامها يا طيّب الجد والخال @ من يزرع الطالات يجني ثمرها
عايض بن حيبان المسردي
