عتاب وباقتين
سلام يا من كلمة الحق ترضيه @ اللي ليا جت طيّبه يغتنمها
عليك يا صاحب كثير المشاريه @ ويا كيف تدرى شرهتي من عدمها
لا مكالمة جتني ولا بيتي تجيه @ وأنا لك الله خوّتك محترمها
لك باقتينٍ يا أبيض الوجه نهديه @ العود الأزرق نفحةٍ من نسمها
الأولة هذا رمضانٍ حراويه @ والثانية عذراً لك الله قسمها
محمد بن مطلق البقمي
ألفٍ هلا
ألفٍ هلا براعا الرساله وطاريه @ الشاعر اللي لا تعصّت خطمها
اللي على العليا تسوقه خطاويه @ ومن لابةٍ فعل المراجل شيّمها
با قاتك الثنتين وأعذب قوافيه @ وصلت وأنا ممنون للي رسمها
وكانك بغيت الحق فأبشر بنوفيه @ وأنت الخصيم ويا بو مطلق حكمها
والعذر وقتٍ كاثراتٍ بلاويه @ ومشاغل الدنيا يرفرف علمها
ولا أنت والله سِعدْ منهو يخاويه @ وأعتّز أنا في خوتك وأحترمها
ويا واحدٍ كل المخاليق ترجيه @ يا من حمى الكعبة وحامي حرمها
الصوم بلّغنا توالي لياليه @ والعتق من نارك ولفحة حممها
وأصلح عطاً أعطيت بارك لنا فيه @ يا سامع الداعي بحالك ظلمها
والقاف عاش وتسلم يمين بانيه @ وعاشت بيوت الشعر واللي نظمها
محسن الزواحمة
ليست هناك تعليقات:
إرسال تعليق