وجهة نظر
أسعد الله صباحك وأسعد الله مساك @ يا صديقِ نهار الضيق محزم ظفر
الله اللي يا بو نايف رفع مستواك @ في فوادي وأنا لي فيك وجهة نظر
ما يسوق المعاني يمّك الا غلاك @ ما تساق المعاني يم زيد وعَمْر
ولي عدوِ يا بو نايف غزى من هناك @ قصده افسادنا في بدو ولا حضر
وأنت لأسرتك ولنفسك تجيب الهلاك @ ما دريت ان وسع البيت بعده قبر
أذكر أبوك في قبره يفيده دعاك @ والدعا ما يجاب الا بحمد وشكر
وش شعورك لو ان لك عبد قام وعصاك @ تامره بأمر لكن ما ينفذ الأمر
والله له المثل الأعلى وربي نهاك @ لا تهاون بوزرك كبر ولا صغر
كيف ترضى تخلي الدش يدخل حماك @ والشرع حط قدامه علامة خطر
مناحي بن معدي
زبدة الهرج
أسعد الله صدى صوتك وطيّب نباك @ يا صديقِ به آماري وأشدّ الظهر
والله انك خوي العمر ما أحدِ سواك @ وأطلب الله يجيرك من صروف الدهر
ولك خويِ على طول الزمن ما نساك @ عشرة سنين لا والله عشرة عمر
وأحمد الله على فضلِ به الله حباك @ يوم زاح الظلام ونور فجره ظهر
كنت لاهي بذا الدنيا وتتبع هواك @ لين سهّل لك المولى دروب السفر
وأطلب من الكريم اللي عطاك وهداك @ وآتحرى الفرج طال الزمان أو قصر
وأنتبه من غلو الدين يغشا سماك @ هو ترى الوجه الآخر غاب ذاك وحضر
أسلك الدرب الأوسط واعتدل في خطاك @ من يمين ويسار الدرب شوك وجمر
والله اللي جعلنا بين هذا وذاك @ حكمةِ ساقها ربي لكل البشر
وكل ما زاد عن حده يجيب الهلاك @ وكل شيِ تلاقي فيه خيرِ وشر
ويا بو راكان كان انك تبي العلم جاك @ وزبدة الهرج فيما دلّ والمختصر
غصب واحد وغصب ثنين تبحث خفاك @ ذاك سافر وذا توّه يجي من سفر
محسن الزواحمة
ليست هناك تعليقات:
إرسال تعليق