إهداء للأخ العزيز/ راشد اللقماني الهاجري
سلام ياهل الطيب وافين الاشبار @ أهل الوفاء وأهل الكرم والشكاله
قومٍ على العليا يسوقون الأعمار @ في وقتنا الحاضر وعصر الجهاله
سقم الحريب وعزّ للضيف والجار @ ومزبان من خيّب عنا الوقت فاله
من لابةٍ خزنة ظفر ماكر أحرار @ كسّابة الطالات وأهل الجماله
وتحيةٍ قنّدتها بنّ وبهار @ وحمّلتها بالعود الأزرق فواله
وأرسلتها من جاش مع بث الأقمار @ مثل السحاب اللي ينشّي خياله
تاصل بني هاجر تباشير وأمطار @ وسيلٍ تحدّر من عوالي جباله
تنبت به ورود ورياحين وأزهار @ ومشاعري تسبق رموز الرساله
عنوانها اللي فزعته درع وستار @ وقوله فعول ووافياتٍ خصاله
يثني تراحيبه ليا جوه خطّار @ ويكرّم الضيفان بأطيّب حلاله
ولا هو غريب الطيب له رمز وشعار @ وهو جمع طيب العمام وخواله
داره مقرٍ للنشاما والأخيار @ العزّ ساسه والكرامه ظلاله
دارٍ غلاها من غلا راعي الدار @ أبو محمد سِعد منهو عناله
راشد وله بالصدر حشمه ومقدار @ ويالله عسانا ما ندوّر بداله
أمدح بني عمي هل العز والكار @ ويستاهلون المدح لا جا مجاله
والمسردي يبدع جزيلات الأشعار @ ويختم بجزل القول ما هو هزاله
سلام ياهل الطيب وافين الاشبار @أهل الوفاء وأهل الكرم والشكاله
ليست هناك تعليقات:
إرسال تعليق